Wag kang manghinayang
Sa panahon na inilaan mo para sa kanya
Pagkat ginusto ka naman talaga nya
Nakita ko ang inyong larawan
Nakita ko ang ngiti sa kanyang mga labi
Habang nakapatong ang kanyang braso sa iyong balikat
Masasabi kong masaya siya
Nakita ko noong panahong magkasama kayo
Nakita ko ang galak sa kanyang mga tawa
Habang nagkukwentuhan kayo
Masasabi kong naaaliw siya
Nakita ko siya habang binabasa ang text mo
Nakita ko ang kislap sa kanyang mga mata
Habang iniintindi ang bawat salitang iyong ipinadala
Masasabi kong natutuwa sya
Wag kang manghinayang
Sa panahong inilaan mo para sa kanya
Pagkat ginusto ka naman talaga niya
Ginusto nya na makasama ka
Ginusto nya ang bawat usapan ninyong dalawa
Ginusto nya na mahawakan ang iyong mga kamay
Ang balutin ka sa kanyang mga bisig
Ang idampi ang kanyang labi sa iyong noo, pisngi, at labi
Ginusto nya na manuod ng sine kasama ka
Ang maglakad sa mall at tingnan ang bawat bagay na pwedeng bilhin
Ginusto nya na kumain kaharap ka
Katabi ka
Ang lasapin ang sarap ng bawat butil ng kanin
Na pinasarap pa lalo kapag sinasabayan ito ng inyong malaman na kwentuhan
Ginusto nya na makilala ang pamilya mo
Ang alamin kung saan nga ba nagmula ang baliw na lagi niyang kasama
Ang baliw na dahilan ng kanyang ngiti
Ginusto ka nya
Kaya wag kang manghinayang
Dahil diba,
Minahal mo naman ang bawat sandali na kasama siya
Minahal mo ang bawat sulok ng kanyang pagkatao
Tinanggap ang bawat kakulangan at kamalian
Kasabay ng kabutihan ng kanyang puso
Gayundin,
Ang pagmamahal sa bawat ideyang pumapasok sa kanyang isipan
Maganda man o hindi
Pagkat tanggap mo na iyon siya
Isama pa,
Ang pagmamahal sa bawat parte ng kanyang pagkatao
Katawan
Handang yakapin at halikan kahit ang hindi kanais nais na parte nito
Minahal ang bawat minutong inilakad nyo sa mall habang tinitingnan ang bawat bagay na pinapangarap mong bilhin para sa inyong dalawa
Minahal ang bawat pagsubo ng kanin habang nakatingin sa kanyang mga mata
Nilalasap ang saya sa bawat niyang kwento
Pagkat alam mo na mas lalalim ang pagkakakilala mo sa kanya sa gayong paraan
At
Minahal mo ang kanyang pamilya
Makilala mo man silang may lahi ng baliw
Pagkat tanggap mo na doon nagmula itong taong minamahal mo ng lubos
Pagkat tanggap mo na sila’y parte niya
Inalis ang takot
Ng mga baka
Pagkat ang nais harapin ay siya
At ang mga sandaling nandyan ka
Sa tabi niya
Sinuong ang napakaliit na butas ng karayom
Na sing-talim ng bawat panghuhusgang ibinabato sa iyo ng mga taong ayaw sa inyong pagsasama
Minahal mo naman siya
Kaya manghinayang ka
Pagkat alamin mo ang pagkakaiba ng gusto ka sa mahal ka
Pagkat ang pagmamahal ay hindi nabubulag sa bawat pagsingkit ng mata dulot ng saya at pagtawa
Bagkus
Ito ay lalong dumidilat
Upang makita ang katotohanan
Ngunit patuloy pa ding ngumingiti, tumatawa
Dahil may pagtanggap
Na
Sa kabila ng lahat
Mahal mo pa din sya
- Cliché of Feeling - September 19, 2020
- In the Blink of an Eye - September 19, 2020
- Cautious - May 10, 2020
